Styrkur til handritarannsókna í Kaupmannahöfn
Ríkisstyrkur Árna Magnússonar (Det Arnamagnæanske Statsstipendium) fyrir árið 2025 er laus til umsóknar. Styrkurinn er veittur íslenskum ríkisborgurum til handritarannsókna í Árnasafni og eftir samkomulagi við önnur söfn í Kaupmannahöfn.
Styrkurinn, sem íslenskir fræðimenn geta sótt um, nemur að þessu sinni, auk ferðakostnaðar, um 25.000 dönskum krónum á mánuði. Árið 2025 er til ráðstöfunar fjármagn til styrkja í 9 mánuði. Styrkurinn er ætlaður til rannsókna í handrita- og textafræði og vinnu að útgáfu handritatexta. Styrktímabilið er 3 til 9 mánuðir fyrir hvern styrkþega.
Styrknum fylgir sú kvöð að styrkþegi skili stuttri greinargerð um árangur sinn af rannsóknardvölinni. Greinargerðina (um 1 A4-síða) skal senda sem fyrst eftir að dvölinni í Kaupmannahöfn lýkur og eigi síðar en mánuði eftir næstu áramót þar á eftir.
Umsóknum skal fylgja ferilsskrá, ásamt ritaskrá og stutt greinargerð fyrir rannsóknarverkefninu (um 1 A4-síða) á dönsku eða ensku ásamt meðmælum og upplýsingum um laun á Íslandi meðan á dvölinni í Kaupmannahöfn stendur. Umsóknir stilaðar á Den Arnamagnæanske Kommission, skal senda í tölvupósti til Morten Tang Petersen, eigi síðar en 15. desember 2024.